RNDDH swete fòs ak kouraj ak tout fanmi moun ki viktim nan antre Site Doudoun yo

20 out 2022, nan granm maten, gen nèf (9) moun pou pi piti ki mouri asasinen nan antre site Doudoun, nan komin Kwadèboukè.
- Twa (3) manm nan yon fanmi : Josette Fils Desanclos ki fèt 10 novanm 1966, Sherwood Sondje Desanclos ki fèt 23 out 1993 ak Sarhadje Desanclos ki fèt 10 fevriye 1998
- Twa (3) chofè moto pami yo Osny ki se chofè epi bòs feronye ;
- Josué Boisrond ki te sou moto avèk Osny ;
- 2 fanm men RNDDH poko jwenn detay sou yo.
Nan yon bat je, nouvèl lanmò 3 manm fanmi Desanclos yo gaye epi choke tout moun pou jan yo pèdi lavi yo a.
Daprè enfòmasyon RNDDH jwenn epi ki t ap sikile sou rezo sosyal yo tou, Josette Fils Desanclos, manman Sherwood Sondje Desanclos ak Sarhadje Desanclos, t ap kondwi yon machin Suzuki Grand Vitara, ki gen koulè nwa, avèk 2 pitit fi li yo. Josette Fils Desanclos t’ap mennen Sarhadje Desanclos nan kou nan Iniv site Pòtoprens apre pou l tal mennen Sherwood Sondje Desanclos achte kèk bagay pou anivèsè li ki te prèske rive.
[…]